د ټرانسپورټ او هوایي چلند وزارت په یوه خبرپاڼه کې ویلي، د ټرانزیټي او بار وړونکو وسایطو د مدیریت، څارنې او خوندیتوب د پیاوړتیا په موخه د ځیرکو قلفونو د نصبولو پروژه نن په کابل کې پرانیستل شوه.
دا پروژه د ټرانسپورټ او هوايي چلند، مالیې وزارتونو او افغان پُست دولتي شرکت ترمنځ د درې اړخیز تفاهملیک پر بنسټ پلې کېږي.
د ځیرکو قلفونو نصب به د ټرانزیټي وسایطو د مدیریت او څارنې ترڅنګ د بار وړونکو وسایطو امنیت لا پیاوړی کړي او سوداګرو ته به زمینه برابره کړي چې مالونه یې په خوندي او چټک ډول تر ټاکلو مقصدونو پورې ولېږدول شي.
د پرانیستې په مراسمو کې یې د چارو د ادارې عمومي رئیس شیخ نورالحق انور، د ښار او کور جوړونې وزیر مولوي نجیبالله حیات حقاني، د ټرانسپورټ او هوايي چلند وزارت د پالیسۍ، خوندیتوب او تفتیش معین مولوي فیضالله جمال حقاني، د امارتي شرکتونو عمومي رئیس احمدجان بلال، د مالیې وزارت د عوایدو او ګمرکونو معین ملا نعمتالله احسان او یو شمېر نورو مسؤولینو ګډون کړی و.