د ریاستالوزرا اداري مرستیال مولوي عبدالسلام حنفي، د افغانستان د خپلواکۍ د بېرته ترلاسه کولو د ۱۰۷مې کلیزې په مناسبت جوړو شویو مراسمو ته وویل، د خپلواکۍ ورځې نمانځل افغانانو ته د خپلو پلرونو هغه تاریخي مبارزه ورپه یادوي، چې په تش لاس یې د استعمارګرو پر وړاندې اوږده مبارزه وکړه او د هېواد خپلواکي یې ترلاسه کړه.
نوموړي ټینګار کړی، چې د دغې خپلواکۍ ساتنه د ټولو افغانانو دیني او ملي وجیبه ده.
حنفي زیاته کړې، افغانانو یو ځل بیا د ډېرو قربانیو او سرښندنو له لارې د امریکا ۲۰ کلن اشغال پای ته ورساوه او اوس په افغانستان کې یو سراسري اسلامي نظام واکمن دی چې باید قدر او ساتنه یې وشي.
نوموړي همداراز ویلي، افغان ولس په تېرو کلونو کې ډېر کړاوونه ګاللي او د هېواد هېڅ سیمه له دغو ستونزو مستثنا نه ده؛ له همدې امله مسوولین باید د خلکو د خدمت او د هغوی د ستونزو د حل لپاره جدي پاملرنه وکړي او د کړاو ځپلو هېوادوالو اړتیاوو ته پر وخت رسېدنه وکړي.