د پنجشیر ولایت د رسنیو دفتر په یوه خبرپاڼه کې ویلي، چې په افغانستان کې د قطر سفیر مردوف القاشوطي د لومړي ځل لپاره پنجشېر ته سفر کړی او د دغه ولایت له والي حافظ محمد آغا حکیم سره یې د پانګونې، پراختیايي پروژو، کرنې، سوداګرۍ او زیربناوو په اړه خبرې کړې دي.
د پنجشېر والي د قطر او افغانستان ترمنځ ښې اړیکې مهمې بللي او ویلې یې دي، چې قطر په سختو شرایطو کې هم له افغانستان سره خپلې ښې اړیکې ساتلې دي او له قطري پانګهوالو یې غوښتنه کړې، چې د پنجشېر د کرنې، باغدارۍ، کانونو او نورو اقتصادي برخو کې پانګونه وکړي.
د قطر سفیر هم د پنجشېر اقتصادي او طبیعي ظرفیتونه مهم بللي او ویلې یې دي، چې قطر په دغه ولایت کې د بېلابېلو پروژو پلي کولو ته چمتو دی او پپه ځانګړي ډول یې د تازه او وچو مېوو د پروسس په برخه کې د پانګونې یادونه کړې.