تسنیم خبري اژانس راپور ورکړی، چې د ایران د ولسمشر مرستیال او د اټومي انرژۍ سازمان رئیس، محمد اسلامي، ویلي چې د دغه هېواد اټومي صنعت د بندیزونو، فشارونو او پوځي بریدونو سربېره د نړۍ د پرمختللو اټومي صنعتونو په کتار کې خپل پرمختګ ته دوام ورکوي.
اسلامي ویلي، ایران د اټومي ټکنالوژۍ په برخه کې د پام وړ وړتیاوې رامنځته کړې او دغه ټکنالوژۍ اوس د صنعت، کرنې او روغتیا په ګډون په بېلابېلو برخو کې کارول کېږي.
نوموړي زیاته کړې، چې ایران د اټومي همجوشۍ «Fusion» پر ټکنالوژۍ هم څېړنې کوي او هڅه کوي په دې برخه کې د نړۍ له پرمختللو هېوادونو سره د پرمختګ له بهیر څخه وروسته پاتې نه شي.
د ایران د ولسمشر مرستیال همداراز ویلي، چې د پلازما ټکنالوژۍ په کارولو سره په کرنه کې د غنمو حاصلات لږ تر لږه ۳۰ سلنه زیات شوي او د مزمنو ټپونو د درملنې لپاره په هېواد کې ۲۰ روغتیايي مرکزونه هم چمتو شوي دي.