هندوکش غږ ته رسېدلي، دقیق معلومات ښيي چې د ايران په مشهد ښار کې د حسيب قوای مرکز، د فاتحې مراسمو د تنظیم په اړه د هغه د کورنۍ، دوستانو او د مقاومت جبهې د یو شمېر کسانو ترمنځ اختلاف رامنځته شوی دی.
د غونډې د ګډونوالو په وينا، د غونډې له رسمي پای وروسته د احمد مسعود یو شمېر نږدې کسانو، په ځانګړي ډول نجیب بارور، وړاندیز وکړ چې د حسیب د فاتحې مراسمو همغږي دې د مقاومت جبهې د دفتر له خوا ترسره شي او غونډې دې هم په همدې دفتر کې جوړې شي.
خو قوماندان منیب امیري دغه وړاندیز رد کړی او ويلي یې دي، چې د جبهې په دفتر کې د مراسمو ترسره کېدل به د یو شمېر کسانو د ګډون مخه ونیسي.
د نوموړي په وینا، که مراسم د جبهې په دفتر کې ترسره شي؛ نو قوماندان ګلحیدر او ځینې نور کسان به په مراسمو کې ګډون ونه کړي.
د غونډې د ګډونوالو په وینا، له دې وړاندې هم هڅې شوې وې چې د حسیب د فاتحې مراسم د جبهې دفتر ته انتقال او د یادو مراسمو مدیریت د جبهې له خوا ترسره شي؛ خو د حسیب د کورنۍ، دوستانو او نورو مهرو د مخالفت له امله دا پرېکړه نه ده عملي شوې.
ګډونوالو ویلي چې د حسیب د فاتحې مراسمو د مدیریت موضوع د جبهې د داخلي اختلافاتو او د هغه د کورنۍ او ملګرو ترمنځ د بېباورۍ يوه بله موضوع ګرځېدلې.