د کره سرچينو د معلوماتو پر بنسټ، د ايران په مشهد ښار کې د حسیب قوای مرکز د فاتحې مراسمو د تنظیم په یوه غونډه کې د تش په نوم مقاومت جبهې د رهبرۍ او د احمد مسعود د مدیریت پر څرنګوالي سختې نیوکې شوې دي.
ويل کېږي، کله چې د احمد مسعود نږدې کس نجیب بارور د هغه د رهبرۍ په دفاع کې پر دې ټینګار وکړ چې احمد «ستر» دی، قوماندان عبدالهادي خالد غبرګون وښود او ویې ویل چې د یوه شخص د ستاینې او تکراري شعارونو له لارې باید خپل نظر پر نورو تحمیل نه شي.
وروسته قوماندان منیب امیري د جبهې د رهبرۍ او د احمد مسعود د نږدې کسانو په اړه خپلې نیوکې مطرح کړې او ویې ویل چې د نظامیانو او مبارزینو ستونزې له اوږدې مودې راهیسې موجودې دي.
امیري ادعا کړې، چې ده څو ځله د نظامیانو او مبارزینو د ستونزو په اړه احمد مسعود ته پیغامونه استولي، خو نږدې دوه کاله کېږي چې ځواب نه دی ورکړل شوی.
د غونډې یو شمېر ګډونوالو ټینګار کړی، چې د شعر، مداحۍ او د اشخاصو د ستاینې له لارې د جبهې داخلي ستونزې نه شي حل کېدای.
د ګډونوالو په وینا، د جبهې اوسنی وضعیت د رهبرۍ، مدیریت، نظامي چارو او د حسيب د وژل کېدو په څېر پېښو په اړه جدي پوښتنې راولاړې کړې او یواځې په شعارونو او د اشخاصو په ستایلو نه شي له پامه غورځول کېدای.