د امر بالمعروف، نهی عن المنکر او شکایتونو اورېدلو وزارت ویلي، چې محتسبینو یې تېره اوونۍ د هېواد په کچه د مېرمنو ۱۰۲ بېلابېلو قضیو ته رسېدنه کړې او په دغو قضیو کې د کورني تاوتریخوالي، میراث، نکاح، ولور، نفقې او طلاق اړوند موضوعات شامل دي.
د وزارت د معلوماتو له مخې، په یادو قضیو کې ۵۴ د کورني تاوتریخوالي، ۱۱ د میراث، ۹ د غیرشرعي نکاح، ۹ د ولور، ۱۰ د نفقې، ۶ د شرعي نکاح د زمینې برابرولو او ۳ د طلاق قضیې شاملې دي.
وزارت زیاتوي، چې د قومي او ژبني تعصبونو د مخنیوي او د یووالي د روحیې د پیاوړتیا په موخه یې اووه لویې دښمنۍ او ۳۴ وړې شخړې هم حل کړې دي.
د یاد وزارت په وینا، په کابل، پروان، بلخ، سرپل او غزني ولایتونو کې یې ۱۱ کوډګر نیولي او د شرعي پرېکړې لپاره یې عدلي او قضایي ارګانونو ته سپارلي دي.
یاد وزارت زیاتوي، چې د سالم اقتصادي نظام د پیاوړتیا، د بیو د کنټرول، د تاریختېرو او بېکیفیته توکو د مخنیوي او د سود، احتکار او په ترازو کې د خیانت د مخنیوي په موخه یې له سوداګرو او هټۍوالو سره ۲۱۳ اصلاحي ناستې هم ترسره کړې دي.