د رویټرز د راپور له مخې، د نړۍ له ۴۳ سلنې څخه زیات د نفتو تولید په هغو هېوادونو کې کېږي، چې له جګړو او شخړو سره مخ دي او دې وضعیت د نړیوالې انرژۍ بازار له جدي فشار سره مخ کړی او د نفتو د عرضې، بیو او لېږد په اړه یې اندېښنې زیاتې کړې دي.
د راپور له مخې، په ۲۰۲۵ کال کې د جګړو او شخړو اغېزمنو هېوادونو شاوخوا ۴۵ میلیونه بېرله نفت په ورځ کې تولید کړي، چې د نړۍ د ټولو نفتو له عرضې څخه څه باندې ۴۳ سلنه جوړوي.
رویټرز وايي، د ایران او امریکا-اسرائیل جګړه، د روسیې او اوکراین جګړه او په لیبیا او وینزویلا کې محدودیتونو د نفتو پر تولید، صادراتو او نړیوالې انرژۍ بازار فشار زیات کړی دی.
راپور زیاتوي، چې یوازې د خلیج په سیمه کې د نفتو د جریان د ګډوډۍ کچه له ۵ تر ۷ میلیونو بېرلو په ورځ کې رسېږي، په داسې حال کې چې د جګړو له امله د نړۍ د نفتو د تصفیې له ۱۰ سلنې زیاته وړتیا هم له فعالیته وتلې ده.
د رویټرز په وینا، د نفتو د عرضې کموالی د بیو د لوړېدو، د لېږد او تولیدي لګښتونو د زیاتېدو او په پایله کې د نړیوال انفلاسیون د لا لوړېدو لامل کېدای شي.