د افغان حکومت ویاند مولوي ذبیحالله مجاهد پر خپله اېکس پاڼه لیکلي، چې پاکستاني پوځي رژیم تېره شپه یو ځل بیا پر کندهار، پکتیا او خوست ولایتونو هوايي بریدونه کړي او دا یې د افغانستان پر وړاندې ښکاره تجاوز او د اصولو خلاف اقدام بللی دی.
مجاهد ویلي، چې په دغو بریدونو کې څلور تنه عام هېوادوال شهیدان شوي دي. نوموړي دغه بریدونه په کلکو ټکو غندلي او ویلي یې دي، چې د پاکستان د هوايي بریدونو پر وړاندې به د افغانستان له لوري مناسب او پرېکنده ځواب ورکړل شي.
نوموړي د پاکستان پوځي رژیم د هغو ادعاوو په اړه هم غبرګون ښودلی چې ګواکې له افغانستان څخه پاکستان ته ډرون الوتکې اوښتې دي او ویلي یې دي، چې دا ډول ادعاوې د هوايي بریدونو د توجیه لپاره مطرح کېږي.
د مجاهد په وینا، داسې بې محاسبې، بې احتیاطه او کرکجن اقدامات بې له شکه چې د افغان ملت غوسه پاروي چې د پاکستاني نظامیانو لپاره به ناوړه پایلې ولري.