د افغانستان لپاره د ملګرو ملتونو مرستندویه پلاوي (یوناما) په یوه خبرپاڼه کې ویلي، چې د کونړ په شلتن او د هلمند په ګرمسیر ولسوالیو کې د پاکستان پوځی رژیم د تېرې شپې په هوايي بریدونو کې ۱۰ ملکي وګړي شهیدان شوي او ۹ نور ټپیان دي، چې ډېری قربانیان یې ماشومان دي.
یوناما ویلي، ملکي وګړي لا هم د جګړو له امله زیانمنېږي او له ټولو اړخونو یې د تاوتریخوالي د کمولو، د خبرو اترو د لارې د ستونزو د حل او د نړیوال قانون د درناوي غوښتنه کړې ده.
د ملګرو ملتونو مرستندویه پلاوي همدارنګه د ملکي وګړو پر وړاندې د لا زیاتو زیانونو د مخنیوي غوښتنه کړې ده. د یوناما په وینا، په یادو بریدونو کې د ملکي وګړو کورونو ته هم زیانونه اوښتي دي.