انادولو خبري اژانس راپور ورکړی، چې د روسیې ولسمشر ولادیمیر پوتین ویلي، چې روسیه تمه لري د اوکراین تر کنټرول لاندې د دونېڅک سیمې پاتې برخې د اوکراین او اروپايي هېوادونو له اټکل څخه ډېرې ژر ونیسي.
پوتین د مسکو په «والدای» بحثکلب کې ویلي، چې اوکرایني چارواکي د دونېڅک د پاتې شاوخوا ۱۱ سلنې سیمې د یوه نیم کال او اروپايي هېوادونه یې د دوو کلونو لپاره د ساتلو اټکل کوي، خو د روسیې په وینا، د خپلو ځواکونو د پرمختګ د چټکتیا له امله به دا سیمې تر دې ډېرې ژر تر خپل کنټرول لاندې راولي.
هغه ادعا کړې، چې روسي ځواکونو د سپټمبر په میاشت کې ۱۳۰۱ کیلومتره مربع سیمه تر خپل کنټرول لاندې راوستې، چې د نوموړي په وینا د تېرو میاشتو په پرتله دوه نیم برابره ډېره ده.