وال سټریټ ژورنال راپور ورکړی، چې تېره شپه، د روسیې ولسمشر پوتین خپل امریکايي سیال ټرمپ سره د اوکراین جګړې، ایران او د دوه اړخیزو اړیکو په اړه له ټیلیفوني خبرو وروسته ویلي، مسکو چمتو دی چې امریکا او نړیوالو بازارونو ته تېل او د تېلو تصفیه شوي محصولات برابر کړي.
پوتین ټینګار کړی چې د تېلو برابرول کولی شي پر نړیوال اقتصاد مثبت اغېز وکړي.
ټرمپ هم ویلي، چې روسیه به سملاسي ۳۰۰ زره ټنه او په راتلونکو میاشتو کې میلیونونه ټنه ډیزل تېل نړیوال مارکېټ ته وړاندې کړي.
وایي، له لومړني پړاو وروسته به ۵۰۰ زره ټنه په نومبر، ۱ میلیون ټنه په ډسمبر او تر هغې وروسته شاوخوا ۳ میلیونه ټنه نور ډیزل د روسیې له تصفیه خانو د تېلو بازار ته ورسېږي.
ټرمپ زیاته کړې، چې له همدې امله د امریکا د خزانې وزارت د روسیې د انرژۍ پر سکتور لګول شوي ځینې بندیزونه په عارضي توګه لغوه کړي دي ترڅو ډیزل تېل نړیوال بازار ته ووځي.
بل خوا د اوکراین ولسمشر زیلېنسکي دا معامله سخته غندلې او دا یې د روسیې پر وړاندې د امریکا د ضعیفوالي علامه بللې ده.