د صنعت او سوداګرۍ وزیر نورالدین عزیزي د افغانستان د کانونو لومړني ځانګړي نندارتون پرانېست غونډې مراسمو کې ویلي، د افغانستان د صادراتو د پروسس زونونو مرکز به تر راتلونکي یوه کال پورې فعال شي.
ښاغلي عزیزي زیاته کړې، د دغه مرکز په فعالېدو سره به د افغانستان صادرات له یوه واحد مرکز څخه مدیریت شي او هېڅوک به ونه شي کولی د هېواد له صادراتي بهیر څخه ناوړه ګټه پورته کړي.
نوموړي دغه راز له بهرنیو پانګهوالو غوښتي، چې افغانستان ته راشي او د هېواد د کانونو په برخه کې پانګونه وکړي.
هغه د اقتصادي ودې لپاره د کانونو ارزښت مهم بللی او د دغو سرچینو د سم او اغېزمن مدیریت پر اړتیا یې ټینګار کړی دی.