د فساد ضد یوې محکمې د روانې فبرورۍ میاشتې په ۲۷مه د پاکستان پخوانی لومړی وزیر عمران خان او مېرمن یې بشری بي بي په رسمې توګه تورن کړل، چې د واک پر وخت یې ځمکه د رشوت په توګه تر لاسه کړې وه.
د فساد ضد محکمې دا پریکړه هغه زندان کې شوې چې ښاغلی خان د تېر کال اګست میاشتې راهیسې پکې د بډې اخیستو، دولتي محرمو اسنادو افشا کولو، جعلي واده او نورو قضیو کې د محکوم کېدو له امله شپې او ورځې تېروي.
دا تازه راپورته شوې قضیه د هغې ځمکې اړوند ده چې ښاغلي خان او مېرمن یې پکې په ۲۰۱۸ کال کې د (القادر پوهنتون ټرسټ) په نامه خیریه سازمان جوړ کړی وو.
دولتي څارنوالانو ادعا کړې چې د همدې پوهنتون د لارې له واکه غورځېدلی صدراعظم د مشهور پاکستاني سوداګر ملک ریاض حسین څخه ارزښت لرونکې ځمکه تر لاسه کړې او د یادې ځمکې په بدل کې عمران خان سوداګر ریاض حسین ته امتیاز ورکړی وو.
په ټول پاکستان کې د عمران خان تحریک انصاف ګوند دا پریکړه غندلې او ویلي دي چې د تور اورېدو وروسته ښاغلي خان او مېرمن یې ځانونه بې ګناه ګڼلي او دا تورونه یې “بیهوده” او احمقانه بللي دي.
عمران خان او مېرمن یې بشرا بي بي د فساد په څو نورو قضیو کې په ۱۴ کلونو بند تیرولو هم محکوم شوي دي، چې له زندانه د خلاصېدو په پار د انتظار شېبې شماري.