محمد فیصل
الجزیرې په هند کې د تیر حکومت د عسکرو د ژوند په اړه یو مطلب خپور کړی دی.
مطلب کې د دریو داسې کسانو سره خبرې شوي چې یو یې ناییتوب (سلماني) کوي، بل یې یو هوټل کې په پیشخدمتۍ او یو یې په یو ورزشي کلب کې په روزنه بوخت دی.
ذکي میرزایي چې ۲۹ کلن دی، وړاندې د تیر حکومت عسکرو کې شامل و، خو په ۲۰۱۹ کال کې غزني کې د طالبانو په یو برید کې ټپي شو.
هغه برید کې د میرزایي ۲۵ ملګري ووژل شول او د ده په ګډون په کې شپږ نور ټپیان شول.
میرزایي د امریکا له ملاتړه برخمن حکومت له لوري هند ته د درملنې په موخه ولیږل شو، خو په کابل د طالبانو له ولکې وروسته میرزایي په هند کې پاتې شو او اوس په نوي ډیلي کې یوه سلماني کې د خلکو ویښتان جوړوي.
میرزایي وایي، کله چې طالبانو کابل ونیوه، نو ټوله شپه مې وژړل.
د خلیل شماس په نوم د تیر حکومت د عسکرو یو ډګرمن هم هند کې دی، خو دی د نوي ډیلي په یو ریسټورنټ کې د پیشخدمتۍ دنده ترسره کوي.
شماس په ۲۰۲۰ کال کې هند ته د پوځي روزنې له پاره لیږل شوی و، خو د زدکړو له بشپړیدو وروسته یې د تیر حکومت پوځ له منځه تللی و.
دی وایي، موږ ۲۰۰ کسان وو چې د زدکړو له بشپړیدو سره ځینې بیرته افغانستان ته او ځینې یې ایران، کاناډا او نورو هیوادونو ته کډوال شول.
خو شماس تر اوسه هند کې دی او ریسټورنټ کې دنده کوي.د شماس یو ورور د غزني د یوې ولسوالۍ ولسوال و چې په ۲۰۱۸ کال کې د طالبانو په یو کمین کې ووژل شو.
عصمت الله اصیل د تیر حکومت یو بل عسکر دی چې اوس د نوي ډیلي په سویل کې په یو ورزشي ځای کې د هلکانو او نجونو په روزنه بوخت دی.
مقاله وایي، اصیل هم د هغو عسکرو له ډلې دی چې د تیر حکومت له لوري هند ته د زدکړو له پاره لیږل شوی وو.
د یادونې وړ ده چې طالبانو د واک ترلاسه کولو وروسته د تیر حکومت ټولو امنیتي ځواکونو ته عمومي عفوه اعلان کړه او زرګونه هغه یې په افغانستان کې پرته له ویرې خپل عادي ژوند کوي.
دغه راز، د تیر حکومت ډیر نظامي کسان په اوسني حکومت کې په دنده بوخت دي.
د دې تیر څنګ د تیر حکومت د وژل شویو عسکرو کورنیو ته اوسنی حکومت نغدي او نورې مرستې ورکوي.