د صهیونیستي رژیم رسنیو راپور ورکړی، چې د ایران پر اټومي تأسیساتو د برید لپاره د دغه رژیم چمتووال وروستي پړاو ته رسېدلی او دا مهال یې وروستي تدارکات لکه، د مهماتو لېږد او د عملياتي پلان پر جوړولو کار روان دی.
دا پرمختګ داسې مهال رسنیز کېږي، چې د امریکا ولسمشر ډونالډ ټرمپ او د صهیونیستي رژیم لومړي وزیر بنیامین نتانیاهو تازه د ایران د اټومي موضوع پر محوریت ۴۰ دقیقې ټلیفوني خبرې کړي.
راپور زیاتوي، چې نتانیاهو تر دغې ټلیفوني اړیکې وروسته د خپلو لوړپوړو پوځي او امنیتي چارواکو سره د ایران د اټومي پروګرام په اړه امنیتي ناسته کړې ده.
له بل لوري ایراني چاراکو هم ورته ګواښ کړی او ویلي یې دي، چې د صهیونیستي رژیم د اټومي تأسیساتو په اړه یې مهم اسناد ترلاسه کړي او هر راز برید ته به متقابل ځواب ورکړي.