راپورونه وايي، د يمن انصار الله يا حوثي ځواکونو د سعودي عربستان د ابها نړيوال هوايي ډګر پر لور شپږ توغندي توغولي دي.
سرچينې ويلي، د دغو توغنديو له توغولو وروسته د سعودي د عسير په سيمه کې، چېرته چې ابها نړيوال هوايي ډګر شتون لري د څو پرلپسې چاودنو غږونه اورېدل شوي دي.
ويل کېږي، توغندي د يمن د صعده ولايت څخه توغول شوي او د لومړنيو ارزونو له مخې لنډ واټن ويشتونکي بالستيک توغندي وو.
تر اوسه سعودي چارواکو د احتمالي مرګژوبلې، زيانونو يا د دغو توغنديو د شنډولو په اړه رسمي څرګندونې نه دي کړي.