تسنیم خبري اژانس راپور ورکړی، چې اسرائیلي پوځي کړۍ په سوریه کې د ترکي ځواکونو پر ضد د احتمالي برید په صورت کې د ناټو د ۵مې مادې د فعالېدو پر موضوع بحث کوي.
د «اسرائیل هیوم» د راپور له مخې، اسرائیل ارزوي چې که په سوریه کې د ترکیې پر مېشتو ځواکونو برید وشي، ایا دا به د ناټو د غړو هېوادونو د ملاتړ او مداخلې لامل شي که نه. د راپور له مخې، د ناټو ۵مه ماده په اتومات ډول له ترکیې بهر، لکه سوریه کې مېشتو ترکي ځواکونو ته نه غځېږي.
دا بحث وروسته له هغه راپورته شوی چې اسرائیلو د سوریې په شمال کې د «ابوالظهور» پر هوايي اډه برید وکړ؛ هغه سیمه چې اسرائیل ادعا کوي ترکیه په کې د خپلو ځواکونو د ځای پر ځای کولو هڅه کوي.
اسرائیلي کړۍ اندېښنه لري چې که په داسې برید کې ترکي سرتېري ووژل شي، د انقرې غبرګون او د امریکا احتمالي ښکېلتیا ښايي وضعیت د اسرائیل او ترکیې تر مستقیمې مقابلې پورې ورسوي.