د امريکا ولسمشر ډونالډ ټرمپ له فاکس نیوز رسنۍ سره د عراقچي د مرکې په غبرګون کې ويلي، چې د امریکا د بریدونو له امله د ایران اټومي تأسیساتو ته ډېر زیان اوښتی او په وينا یې که اړتیا پېښه شي، نو یو وار بیا به پر دغه هېواد برید وکړي.
تر دې وړاندې د ایران د بهرنیو چارو وزیر عباس عراقچي له فاکس نیوز سره په مرکه کې د امریکا هغه غوښتنه رد کړې، چې ایران دې د یورانیمو له غني کولو لاس واخلي.
عراقچي ويلي و، چې دا مهال د ايران اټومي تأسيساتو ته د اوښتو زيانونو کچه معلوموي او په خبره یې د شرايطو په برابرېدو سره به ژر تر ژره د يورانيمو غني کول بيا پيل کړي.