د بلخ ولایت د رسنیو دفتر په یوه خبرپاڼه کې ویلي، چې د امنیتي او تصفیوي کمېسیون نوبتي غونډه د دې ولایت د والي ملا محمد یوسف وفا په مشرۍ ترسره شوې او د امنیتي او ملکي ادارو مسوولینو د امنیتي وضعیت، د قاچاق د مخنیوي او د چارو د لا ښه تنظیم په اړه یې بحثونه کړي دي.
خبرپاڼه زیاتوي، په دغه غونډه کې د بلخ ولایت مرستیال والي، د ۲۰۹ الفتح قول اردو، امنیه قوماندانۍ، استخباراتو، نظامي او ملکي ادارو یو شمېر مسوولینو ګډون کړی و.
د بلخ والي د غونډې پر مهال ټینګار کړی، چې د امنیت ټینګښت، د نظام د پیاوړتیا، د ادارو ترمنځ د همغږۍ زیاتوالی او د خلکو د خدمتونو د کیفیت لوړول د یاد کمېسیون مهمې موخې دي.
په ناسته کې د قاچاق د مخنیوي، له ګاونډیو هېوادونو سره د اړیکو د پراختیا، امنیتي موضوعاتو او یو شمېر ملکي چارو په اړه نظرونه وړاندې شوي او د لا ښه نظم او اغېزمنتیا لپاره پرېکړې شوې دي.
د غونډې په پای کې والي ټولو اړوندو ادارو ته لارښوونه کړې، چې د پلانونو په عملي کولو، د چارو په چټکتیا او د امنیتي او ملکي خدمتونو په پیاوړتیا کې لا زیاتې هڅې وکړي.