د پېښو پر وړاندې د مبارزې آمادهګۍ ادارې په یوه خبرپاڼه کې ویلي، چې د دې ادارې عمومي رئیس، ملا نورالدین ترابي، د کډوالۍ نړیوال سازمان (IOM) له رئیسې میا پارک او مل پلاوي سره په لیدنه کې د طبیعي پېښو د مخنیوي لپاره د بنسټیزو او وقایوي پروژو پر پراختیا او د دواړو ادارو پر لا زیاتې همغږۍ ټینګار کړی.
خبرپاڼه زیاتوي، چې د پېښو پر وړاندې د مبارزې آمادهګۍ ادارې رئیس ویلي، که څه هم خوراکي او غیرخوراکي مرستې مهمې دي، خو دوامدارې پایلې هغه مهال ترلاسه کېږي، چې لومړیتوب وقایوي او بنسټیزو پروژو ته ورکړل شي. هغه زیاته کړې، چې د خطر له ګواښ سره مخ سیمې د ادارې له لوري سروې شوې او اړوندې پروژې باید د همدې ادارې په همغږۍ عملي شي.
په ورته وخت کې د (IOM) رئیسې میا پارک ویلي، چې د دې سازمان له لوري په هېواد کې د پلي شویو ۷۳ پروژو ۹۰ سلنه د پېښو پر وړاندې د مبارزې ادارې له پلانونو سره سمې عملي شوې دي. هغې ډاډ ورکړی، چې راتلونکې پروژې به هم د یادې ادارې د لومړیتوبونو او ستراتیژۍ له مخې طرحه او پلي کېږي.
د غونډې په پای کې دواړو لورو د ګډو همکاریو پر دوام او د طبیعي پېښو د مدیریت لپاره د رضاکارانو د ازمایښتي پروګرام پر عملي کېدو هم ټینګار کړی.