د آر ټي عربيک رسنۍ د راپور له مخې د ترکیې او اسرائیل ترمنځ په ټولنیزو شبکو کې لفظي ټکر رامنځته شوی او د دواړو هېوادونو پوځونه په خپلو رسمي پاڼو کې د انځورونو او لنډو جملو له لارې یو بل ته غیرمستقیم پیغامونه استولي دي.
سرچينه وايي لومړی، ترکیې د «زورور او زړور» تر سرلیک لاندې د ټانک پر سر ولاړ د خپل سرتېری انځور خپور کړی؛ ورپسې د اسرائیل پوځ د خپل ټانک او بیرغ انځور د «زورور، پرېکنده او باعزته» په جمله ځواب کړی دی.
له دې وروسته بيا، د ترکیې دفاع وزارت لیکلي، چې ریښتینی ځواک په وسلو نه، بلکې د خلکو په باور کې نغښتی دی.
ياده دې وي، چې وروستیو پېښو، په ځانګړي ډول د فلسطین او سوریې وضعیت، د ترکیې او اسرائیل اړیکې خورا ترینګلې کړي او ځينو شنونکو ان د دواړو لوريو ترمنځ د جګړې وړاندوینه کړې ده.