له ارګ څخه په خپره شوې خبرپاڼه کې راغلی، چې د افغان حکومت رئیسالوزراء، الحاج ملا محمد حسن اخند، د ازبکستان د لومړي وزیر له مرستیال، جمشېد خواجهیف او مل پلاوي سره په ګلخانې ماڼۍ کې د لیدنې پر مهال د دواړو هېوادونو ترمنځ د اقتصادي، سوداګریزو او پانګونې همکاریو پر پراختیا ټینګار کړی دی.
د افغان حکومت رئیسالوزراء د ازبکستان د لوړپوړي پلاوي د هرکلي ترڅنګ ویلي، چې د دغه پلاوي سفر د دواړو هېوادونو ترمنځ د اړیکو د لا پیاوړتیا او د افغانستان پر اقتصادي راتلونکې د ازبکستان د باور څرګندونه کوي. هغه ټینګار کړی، چې افغان حکومت له ازبکستان سره د همکاریو د پراختیا او د شویو هوکړو د عملي کولو لپاره بشپړه ژمنتیا لري.
د ازبکستان د لومړي وزیر مرستیال په دې لیدنه کې ویلي، کابل ته د لوړپوړي دولتي او اقتصادي پلاوي د سفر موخه د دواړو هېوادونو ترمنځ د سیاسي او اقتصادي اړیکو پیاوړتیا او د شویو اقتصادي ژمنو عملي کول دي. هغه زیاته کړې، افغانستان د ازبکستان په بهرني سیاست کې ځانګړی ځای لري او هېواد یې غواړي له افغانستان سره د سوداګرۍ او پانګونې کچه نوره هم لوړه کړي.
جمشېد خواجهیف زیاته کړې، تېر کال ازبکستان ته د افغانستان صادرات ۱۵۰ میلیون ډالرو ته رسېدلي وو او د روان کال له پیله تر اوسه دغه صادرات ۱۱۱ میلیون ډالرو ته رسېدلي دي. نوموړي همداراز ویلي، ازبکستان تر اوسه افغانانو ته ۵ زره ویزې صادرې کړې، چې د دواړو هېوادونو د اقتصادي او دوستانه اړیکو د پراختیا څرګندونه کوي.
دا لیدنه په داسې حال کې ترسره کېږي، چې افغانستان او ازبکستان په وروستیو کلونو کې د سوداګرۍ، پانګونې، ټرانزیټ او سیمهییز اتصال په برخو کې خپلې دوهاړخیزې اړیکې پراخې کړې دي.