په سپينه ماڼۍ کې د يوه خبري کنفرانس پر مهال د اوکراین له ولسمشر ولادیمیر زیلینسکي سره د امریکا د ولسمشر ډونالډ ټرمپ له شخړې وروسته، اروپایي مشرانو د واشنګټن په وړاندې د اوکراین کلک ملاتړ کړی او توند غبرګونونه یې ښودلي دي.
په غبرګونونو کې د اروپايي ټولنې د کميسيون مشرې «اوروزلا فن در لاين» په خپله اېکس پاڼه د اوکراين ولسمشر زيلينسکي ته ليکلي: «ستا شرافت، د اوکرایني ولس زړورتیا ته درناوی کوي، پیاوړی، زړور، او بېباک اوسه، تاسو هیڅکله یوازې نه یاست، موږ به ستاسو ترڅنګ د عادلانه او تینګې سولې لپاره کار ته دوام ورکړو».
دغه راز د فرانسې ولسمشر ايمانوئل مکرون، له ډونالډ ټرمپ سره د زیلینسکي له شخړې وروسته، د اوکراین ولسمشر سره ټيليفوني اړيکه نيولې او له هغه یې خپل ملاتړ څرګند کړی دی.
له بل لوري بيا د جرمني د مسیحي دیموکرات ګوند مشر او راتلونکي احتمالي صدراعظم «فریدریش مرتس» ويلي، چې جرمني به په هر ډول سختو او اسانه شرايطو کې د اوکراین ترڅنګ پاتې شي، هغه زياته کړې «په دې وحشتناکه جګړه کې، هیڅکله باید یرغلګر او قرباني سره پرتله نه کړو».
همدا راز د اروپایي ټولنې د بهرني سیاست مسؤلې «کایا کالاس» ويلي، چې اوس وخت رارسېدلی چې آزادې نړۍ ته یو نوی مشر پیدا شي، هغې زیاته کړې «نن ورځ معلومه شوه، چې ازاده نړۍ نوي مشرتابه ته اړتیا لري، دا مسؤلیت اوس د اروپایي هېوادونو پر غاړه دی، او دا موږ اروپایان یو، چې باید دا چلنج ومنو».
د يادونې وړ ده، چې پر دې سربېره ټاکل شوې سبا يکشنبه د اوکراين د ولسمشر ولاديمير زيلينسکي په ګډون د اروپايي ټولنې مشران د بريټانيا د صدراعظم کيير سټارمر په کوربه توب په بريټانيا کې يو غونډه ترسره کړي.