یادؤنه: په هندوکشغږ کې نشر شوې لیکنې، مقالې او تبصرې یواځې د لیکوالانو نظر څرګندوي، د هندوکشغږ توافق ورسره شرط نه دی.
د پښتونخوا اعلی وزیر علي امین ګنډاپور ویلي چې افغانستان ته به لاړ شي او له افغان حکومت سره به په پښتونخوا کې د امنیت په اړه خبرې وکړي.
دا لومړی ځل دی چې په پیښور کې د تحریک انصاف د حکومت له راتلو وروسته ګنډاپور دغه ډول څرګندونې کوي.
پښتونخوا کې وروستیو دوه کلونو کې امنیتي وضعیت د نور پاکستان په پرتله ډیر خراب شوی او هره ورځ د چاودنو، جګړو او هدفي وژنو راپورونه ورکول کېږي؛ د دغو پیښو ډیر قربانیان د پښتونخوا پولیس دي.
د ګنډاپور دې څرګندونو ته د پاکستان دفاع وزیر(د پوځ غیر رسمي نماینده) خواجه اصف ویلي، ایالتي حکومت ته به اجازه ور نه کړي چې له چا سره خبرې وکړي.له کلونو راهیسي تحریک طالبان پاکستان له پاکستاني ځواکونو سره په جګړه دی چې په دغه جګړه کې تر اوسه زرګونه تنه وژل شوي دي.
د پاکستاني پوځ عملیاتو نه یوازې پاکستاني طالبان ختم نه کړل، بلکې د خپلو ناسمو پالیسیو او ظالمانه کړنو له امله یې پاکستاني طالبان نور هم زیات کړل.
سره له دې چې افغان حکومت په ځلونو په افغانستان کې د پاکستاني طالبانو موجودیت رد کړی، خو دا یې هم ویلي چې د پاکستاني حکومت او پاکستاني طالبانو تر منځ منځګړيتوب کولی شي.
په تېر کې په کابل کې د دواړو لورو تر منځ ناستې هم شوي، خو د پاکستاني پوځ د سخت دریځ او بې مورده بدمعاشیو مذاکرات ناکام کړل او پاکستاني طالبانو بیا جګړې ته شدت ورکړ.
د پښتنو مشران او د پښتونخوا د حکومت لوړ پوړي چارواکي پوه شوي چې د پښتنو د سیمې په ناامنۍ کې د اسلام اباد فدرالي حکومت او که لږ یې واضح ولیکو د پوځ د مرکز راولپنډۍ لاس دی، ځکه جګړه کې یوازې پښتانه وژل کېږي او له ستونزو سره هم یوازې پښتانه مخ دي.
که چېرته جګړه پنجاب او نورو سیمو ته غځېږي، بیا به پوځ او پنجابی حکومت پوه شي چې له سېره څو پخېږي.
کله چې د پاکستان دوه مهم ایالتونه پنجاب او سند ته د پاکستاني طالبانو لاس وغځېږي، نو بیا به پاکستانی اسټبلشمنټ(پوځ او آی ایس آی) هر څه ته غاړه کېږدي، خو ستونزه دا ده چې د پښتنو طالبانو مخې ته هم پښتون پولیس او ملیشه ولاړه ده او وړاندې تګ ته یې نه پرېږدي.پاکستانی اسټبلشمنټ باید پښتونخوا سره د مور و میرې چلند پرېږدي او پښتونخوا چې له کومو ستونزو سره مخ ده، مخکې له دې چې د نورو پښتنو وینه توی شي او ستونزې زیاتې شي، باید له پاکستاني طالبانو سره یو تفاهم ته ورسېږي او د ستونزو په حل کې خنډ نه شي.
د پیښور ایالتي حکومت پوه شوی چې د پښتنو په سیمه کې د ناامنۍ اصلي لامل اسټبلشمنټ (راولپنډۍ) ده، ځکه خو هڅه کوي چې خپله راپاڅي او د پښتنو ستونزې د پوځ او مرکزي حکومت له مشورې پرته حل کړي؛ پیښور او پښتانه تل مظلوم وو/دي.