الجزیرې راپور ورکړی، چې روسي ځواکونو د توغندیو او بېپیلوټه الوتکو په وسیله د اوکراین پر پلازمېنه کېیف او شاوخوا سیمو پراخ بریدونه کړي دي، چې د هېواد د بېلابېلو برخو امنیتي وضعیت یې کړکېچن کړی دی.
راپور کې راځي، چې دغه بریدونه د دنیپروپتروفسک، پولتاوا، چرکاسي او چرنیهیف ولایتونو تر څنګ د کېیف په ځینو سیمو کې هم ترسره شوي، چې هدف یې د پوځي-صنعتي مرکزونو، د انرژۍ زېربناوې او هوايي ډګرونو اړوند تأسیسات بلل شوي دي.
اوکرایني چارواکي وایي، په بریدونو کې د استوګنې ځینې ودانۍ زیانمنې شوي، اورلګېدنې رامنځته شوي او د ملکي وګړو د احتمالي مرګژوبلې راپورونه هم ورکړل شوي دي. د ژغورنې ډلې د نړېدلو ودانیو لاندې د خلکو د لټون او ایستلو عملیاتو ته دوام ورکوي.
بل لور ته، د روسیې دفاع وزارت ادعا کړې، چې بریدونه یې یوازې پر پوځي او صنعتي اهدافو متمرکز وو او د اوکراین د هوايي دفاع سیستمونه هم په نښه شوي دي.
الجزیره زیاتوي، چې دا بریدونه د روسیې او اوکراین ترمنځ د اوږد واټن جګړې د زیاتېدو په لړ کې ترسره شوي، په داسې حال کې چې دواړه لوري یو بل د انرژۍ او پوځي زېربناوو په هدف کولو تورنوي.