له کابله خپرېدونکې (مسیر) ورځپاڼې په خپله نننۍ سرلیکنه کې د مسعینک کان په استخراج باندې بحث کړی دی.
ورځپاڼي لیکلي: پرون د کانونو او پټرولیم وزارت ویاند همایون افغان ویلي وو، چې د مسعینک کان چارې به د روانې اوونۍ په پای کې پیل شي.: «مس عینک کان کې د عملي کار پیلېدل د افغانستان لپاره یو ښه خبر او لوی گام دی چې د دغه هېواد اقتصادي پرمختگ ته وده ورکوي؛ دا پرېکړه د مخکېني او اوسني افغان سرپرست حکومت او تړون لرونکې کمپنۍ د اوږدو کلونو ژمنو عملي کېدو په لور لومړی اساسي گام ښکاري چې د هېواد په اقتصادي وضعیت کې به مثبت بدلون راولي؛ د مسعینک کان چې د کابل سوېل ختیځ ۴۰ کیلومترۍ کې د لوگر په یوې بېحاصلې سیمه کې موقعیت لري، په نړۍ کې د مسو تر ټولو ستر کان دی او د افغانستان د یوې طبیعي پانگې د سرچینې په توگه شمېرل کېږي.»
د سرلیکنې له مخې، د مسعینک کان د استخراج پیل به په سیمه کې د زرگونو کاري فرصتونو زمینه برابره کړي او د هیواد اقتصادي وضعیت ته به گټه ورسوي.:«دا د افغانستان لپاره یو لوی او مهم گام دی چې د دغه هېواد اقتصادي پرمختگ ته وده ورکوي؛ د مسعینک په کان کې د مسو د زېرمې کچه، څه باندې ۱۱ مېلیون ټنو ته رسېږي، چې دا د افغانستان د اقتصادي وضعیت لپاره یو لوی فرصت دی.»
په سرلیکنه کې ویل شوي، د دغه کان تړون په ۲۰۰۸ز کال کې د امسيسي له چینايي شرکت سره د ۳۰ کلونو لپاره شوی؛ خو د بېلابېلو دلیلونو له مخې د دغه کان د استخراج چارې پیل نهشوې.: «افغان سرپرست حکومت ته په کار ده چې د تړون جدي څارنې تر څنگ تړوني کمپنۍ سره په همغږۍ کار وکړي او شته خنډونه له مخې ژر تر ژره لرې کړي ترڅو د مس عینک کان استخراج چارې په بریالیتوب سره تر سره شي او د افغانستان اقتصادي پرمختگ ته وده ورکړي.
د دې کان عملي کار پیل د افغانستان د اقتصادي راتلونکي لپاره یو مهم گام دی او د دې هېواد وگړو ته به د کار او پرمختگ فرصتونه برابر کړي.
له دې امله، افغان حکومت او تړون لرونکې کمپنۍ باید خپلې ژمنې عملي کړي او د دې سترې پروژې په بریا کې ونډه واخلي.»
د سرلیکنې د لیکوال په باور، د مس عینک کان استخراج به نه یوازې د افغانستان اقتصادي وضعیت ښه کړي، بلکې د نړیوالو پانگهوالو لپاره به هم د افغانستان د کانونو سکتور جذاب کړي.
دا به د نورو ستراتیژیکو پروژو د پیل لپاره هم یو ښه مثال وي او د هېواد په پراختیا کې به لوی رول ولوبوي. په دې توگه، د مس عینک کان د استخراج پیل د افغانستان د اقتصادي پرمختگ لپاره یو نیک او مثبت گام دی چې ټول افغانان یې هرکلی کوي.