د امارتي شرکتونو عمومي ریاست په یوه خبرپاڼه کې ویلي، چې د ښاري اوبو رسولو او فاضلابو امارتي شرکت اجرائیوي رئیس مولوي غلامالرحمن کظیم د هند د کور جوړونې او ښاري چارو وزارت له لوړپوړو چارواکو سره د ښاري فاضلابو د مدیریت، د تصفیې مرکزونو جوړولو او د کارکوونکو د مسلکي ظرفیت لوړولو په اړه خبرې کړي.
د امارتي شرکتونو عمومي ریاست په وینا، په دې ناسته کې هندي لوري د ښاري فاضلابو د سیسټمونو او مدیریت په اړه معلومات وړاندې کړي او د دغه هېواد د «امروت» (AMRUT) پروژې په ګډون یې د ځینو پراختیايي پروژو په اړه له افغان پلاوي سره معلومات شریک کړي.
د هند د کور جوړونې او ښاري چارو وزارت چارواکو د ګډو همکاریو د پراختیا ډاډ ورکړی او ویلې دي، چې د فاضلابو د تصفیې مرکزونو، په ځانګړي ډول د حوضي سیستمونو د جوړولو او د ښاري اوبو رسولو او فاضلابو امارتي شرکت د کارکوونکو د مسلکي او تخنیکي ظرفیت لوړولو په برخو کې به همکاري وکړي.
مولوي غلامالرحمن کظیم هم د دوهاړخیزو همکاریو پر پراختیا، د مسلکي تجربو او پوهې پر شریکولو، د کارکوونکو د ظرفیت لوړولو او د فاضلابو د تصفیې د تأسیساتو د جوړولو او پراختیا په برخه کې د هند له تجربو څخه د ګټې اخیستنې پر اهمیت ټینګار کړی.