د «یوګو» په نوم د سروې يوه نړيوال شرکت په خپله تازه سروې کې ښودلې، چې د بریتانیا د خلکو په منځ کې د یهود ضد نظریات په تېرو لسو کلونو کې تر ټولو لوړې کچې ته رسېدلي دي.
د سروې د پایلو له مخې، د بریتانیا د ټول نفوس ۲۱ سلنه وګړي د يهود ضد څرګندونو سره موافق دي؛ په داسې حال کې، چې دا شمېره تېر کال ۱۶ سلنه او په ۲۰۲۱م کال کې یوازې ۱۱ سلنه وه، چې په دې ډول په تېرو پنځو کلونو کې نږدې دوه برابره شوې ده.
د يوګو شرکت په سروې کې نږدې ۴۵ سلنه خلکو ویلي، چې اسرائیل له فلسطینیانو سره د نازي آلمان په څېر له ظلم او وحشت ډک چلند کوي.
له ۱۸ څخه د ۲۴ کلونو په منځ کې ۶۰ سلنه ځوانان له دې نظر سره موافق دي، چې اسرائیل نازي المان ته ورته له تشدد ډک چلند کوي او نږدې ۵۰ سلنه ځوانانو بيا ویلي، چې د هغو خلکو ترڅنګ د راحتۍ احساس نه لري، چې په ښکاره توګه د اسرائیلو ملاتړ کوي.
په شوې سروې کې دغه راز ۲۰ سلنه ځوانانو ویلي، چې اسرائیل د یهودانو د ملي وطن په توګه د يوه هېواد د جوړولو حق نه لري.
پر دې سربېره ۵۸ سلنه ځوانان او ۲۹ سلنه د بريتانيا ټول نفوس بيا په دې باور دی، چې اسرائیل او د هغوی د پلویانو کړنې د بریتانیا په ډیموکراسۍ منفي اغېزه غورځولې.
د بريتانيا د خلکو ترمنځ په شوې سروې کې د دغه هېواد د ټولو خلکو ۲۶ سلنه او د ځوانانو ۴۲ سلنه په دې نظر دي، چې اسرائیل ځکه هر څه کولی شي چې پلویان او ملاتړي یې د نړۍ رسنۍ تر خپل کنټرول لاندې لري.
پر دې سربېره د بريتانيا د ځوانانو ۱۰ سلنه د حماس غورځنګ په اړه مثبت نظر لري، ۱۴ سلنه ځوانانو یې ویلي چې حماس غورځنګ باید د ترهګرې ډلې په توګه ياد نه شي او ۱۹ سلنه نورو ځوانانو بيا د حماس غورځنګ له لوري پر اسرائیلو د ۲۰۲۳م د اکتوبر د اوومې بریدونه په حقه ګڼلي دي.
د يادې سروې ترسره کوونکي بنسټ په پای کې خبرداری ورکړی، چې په ځوانانو کې دا ډول نظریات، بریتانیا مېشتو یهودانو ته په پوهنتونونو، ټولنیزو رسنيو او کاري ځایونو کې جدي ستونزې او خطرونه پېښولی شي.