الجزیره نړيوال ټلويزيون د لبنان روغتیایي چارواکو له قوله ليکي چې د دې هېواد په جنوب کې د صهيونيستي اسرائیلو د وروستیو دوو ورځو د هوایي بریدونو په نتیجه کې د وژل شویو کسانو شمېر ۵۶۴ ته رسېدلی دی.
الجزیره همدارنکه زياتوي چې نن چهارشنبه سهار وختي حزب الله په يوه اعلاميه کې د خپل يوه جګپوړي قومندان ابراهيم محمد قبيسی د وژل کېدو خبر تاييد کړ، او زياته کړې یې ده چې هغه د صهيونيستي اسرائیلو په پروني بريد کې چې د بيروت په جنوب د «الغبيره» په نوم سيمه کې یې په يوه لوړ پوړيزه ودانۍ کړی وژل شوی.
له کله چې صهيونيستي اسرائیلو په غزه يرغل وکړ، حزبالله د غزې په دفاع کې له صهیونیستي اسرائیلو سره په جګړه کې ښکېل شو، او ډېری وخت یې په خپلو توغنديزو بريدونو صهيونيستي اسرائیلو ته پراخه مرګ ژوبله او زيانونه اړولي.
صهيونيستي اسرائیلو د دوشنبې په ورځ د لبنان پر جنوب او ختیځ په سلګونو هوایي بریدونه وکړل چې په نتیجه کې په زرګونو کسان اړ شوي چې له خپلو کورونو نورو ځایونو ته کډه شي.
هاخوا بيا اسرائیلي رسنیو خبر ورکړی چې، پرون سه شنبه حزب الله له لبنان څخه د دې هېواد پر جنوبي سیمو څه باندې درې سوه توغندي ویشتلي چې پراخ ځاني او مالي زيانونه یې اړولي.
د لبنان د حزب الله او صهیونیستي اسرائیلو تر منځ جګړه داسې مهال پراخه شوه چې په دې وروستيو کې حزب الله د غزې د مظلومو خلکو په دفاع کې په اسرائیلو پراخ بريدونه ترسره کړل، او تازه یې هم په يوه بيانيه کې وېلي چې دوی به تل د غزې دفاع ته چمتو وي او تر وروستۍ سلګۍ به د صهيونيستي رژيم پر وړاندې جنګېږي.