آر ټي عربيک رسنۍ راپور ورکړی، چې د اسرائیل لخوا “سومال لېنډ” د یوه خپلواک دولت په توګه پېژندلو اصلي هدف، هلته د غزې اوسېدونکو لپاره د کډوالۍ کمپونو جوړول دي.
سرچينې ويلي، همداراز دا اقدام ستراتیژیک امنیتي، سیاسي او پوځي اهداف هم لري، ځکه د سره سمندر پر غاړه د یادې سیمې موقعیت اسرائیل ته د احتمالي پوځي هډې لپاره ارزښتمن بلل کيږي، څو پر حوثیانو فشار زیات کړي.
په ورته وخت کې د سوماليا ولسمشر حسن شيخ محمود دا اقدام د نړیوالو قوانینو خلاف او د سومالیا په داخلي چارو کې ښکاره لاسوهنه بللې ده.
پر دې سربېره ټاکل شوې د عرب هېوادونو اتحادیه نن په دې اړه بېړنۍ ناسته وکړي.
ياده دې وي، چې سومال لېنډ له اماراتو، تایوان او ایتوپیا سره نږدې اړیکې لري او امارات هلته پوځي اډه هم لري، خو دا ګام د مصر، ترکیې، سومالیا او جیبوټي له سخت غبرګون سره مخ شوی دی.