لیکوال: محمد فیصل
افغانستان کې له پنځو لسیزو جګړو او نا امنیو وروسته د امن راتلو له امله اوس کورنۍ او بهرنۍ پانګونې ته ښه فرصت برابر شوی دی.
د صنعت او سوداګرۍ وزارت د راپور پر بنسټ، د روان لمریز کال په لومړیو دریو میاشتو کې په ټول افغانستان کې ۱۲۱ نویو تولیدي فابریکو فعالیت پیل کړی دی؛ دغه راز، په دغه موده کې ۲۱۷ تولیدي ماشینونه هم هیواد ته راوړل شوي دي.
په ۱۴۰۲ کال کې بیا ۶۱۴ نویو فابریکو فعالیت پیل کړی وو او څه کم ۱۱۰۰ ماشینونه د سوداګرو له لوري هیواد ته راوړل شوي چې بیلابیلو برخو کې تولید کوي.
دا د کم ساري امنیت او ثبات له امله ده چې کورني او بهرني پانګوالو افغانستان ته مخه کړې ده.
افغانستان چې بې کاري په کې هر وخت یوه لویه ستونزه وه، اوس هیله مندي شته چې د فابریکو او نورو لویو او کوچنیو پروژو په پیل سره به د بې کارۍ او بې وزلۍ کچه راټیټه او افغانان به د یو هوسا ژوند خاوندان شي.
فابریکي ډیرې بریښنا ته اړتیا لري، خو له بده مرغه چې افغانستان کې د بریښنا لږوالی هم یوه لویه ستونزه ده.
د افغانستان د بریښنا اکثریت ډیمونه د پخواني پاچا محمد ظاهر په پاچایی کې د پخواني شوروي اتحاد له لوري جوړ شوي چې تر اوسه ترې ګټه اخیستل کیږي.
وروستیو جګړو افغانستان ته دا فرصت ور نه کړ چې د بریښنا لوی ډیمونه جوړ کړي، ولې اوس چې جګړه نشته، نو د نورو تر څنګ د بریښنا ډیمونو جوړولو ته هم زمینه برابره ده.
له نیکه مرغه چې اقتصادي معاونیت دې برخې ته هم توجه کړې ده چې وروستۍ بیلګه یې د سروبي ۲ بند د جوړلو تاییدي او د بودیجې تخصیص کول دي.
دغه راز، د وارداتي بریښنا برخه کې د بغلان له سب سټیشن څخه کابل او نږدې ولایاتو ته د واراداتي بریښنا د لیږد د پروژې پیل هم یو لوی کار دی چې کولی شي د فابریکو برخه کې د بریښنا د لږوالي ستونزه حل کړي.
د بریښنا زیاتوالی د فابریکو په زیاتوالي او فابریکي د کورني اقتصاد په ښه کیدو او بې وزلۍ ختمولو کې ډیر لوی رول لوبولی شي.
که چیرې د بریښنا ستونزه حل او د فابریکو له لارې خپل باکیفیته تولیدات ولرو، نو افغانستان به ډیر ژر پر خپل ځان متکي شي او د حکومت وروستیو ګامونو ته په کتو ښکاري چې پر ځان د متکي کیدو پر لور چټک ګامونه اخیستل کیږي.
