د افغان حکومت مرستیال ویاند پر خپله اېکس پاڼه په نورستان ولایت کې د وروستیو سېلابونو له امله د رامنځته شوو ځاني او مالي زیانونو په اړه د خواخوږۍ پیغام خپور کړی دی.
په پیغام کې ویل شوي، چې وړمه ورځ د نورستان مرکز او شاوخوا سیمو کې راوتلو سېلابونو ګڼو هېوادوالو ته مرګژوبله او مالي زیانونه اړولي دي. د معلوماتو له مخې، په دې پېښه کې د نورستان د ښاروال او یوه کنډک د قومندان په ګډون ۲۴ تنه هېوادوال شهیدان شوي او ۸۵ تنه نور ټپیان شوي دي.
افغان حکومت د قربانیانو له کورنیو سره ژوره خواخوږي څرګنده کړې، شهیدانو ته یې د جنت الفردوس او ټپیانو ته د عاجلې روغتیا دعا کړې ده.
په پیغام کې راغلي، چې اړوند ادارې د پېښې له لومړۍ ورځې د خلکو د ژغورنې او مرستې لپاره پر دندو ګومارل شوې دي او له زیانمنو کورنیو سره به د مرستې لړۍ دوام ولري.
افغان حکومت له سوداګرو، پانګهوالو او توان لرونکو افغانانو غوښتي چې له سېلاب ځپلو سره د مرستې په برخه کې ونډه واخلي او له خپلو هېوادوالو سره په دې سخت حالت کې ودرېږي.
دغه راز له خلکو غوښتل شوي چې د سېلابونو د خطر په سیمو کې له استوګنې او کاروبار څخه ډډه وکړي او د هوا پېژندنې ادارې د خبرداریو په پام کې نیولو سره لازم احتیاط وکړي، څو د ورته پېښو له امله د زیانونو مخه ونیول شي.