د امریکا متحده ایالاتو د دفاع وزارت(پنټاگون) وايي، په عراق او سوریه کې یې پر ۸۵ ایراني موخو هوايي بریدونه کړي دي.
له یاد وزارت څخه په خپره شوې خبرپاڼه کې ویل شوي، په عراق او سوریه کې یې پر ایراني ملېشو هوايي بریدونه کړي؛ خو تر اوسه د اوښتې مرگژوبلې په اړه کره معلومات نه لري.
د خبرپاڼې له مخې، امریکا وروسته له هغه په عراق او سوریه کې پر ایران پلوه ملېشو هوايي بریدونه وکړل، چې د تېرې یکشنبې پر ورځ د سوریې پولې ته نږدې د امریکايي عسکرو پر یوې پوځي اډه د بېپېلوټه الوتکې برید وشو، چې له امله یې ۴۴ امریکايي عسکرو ته پکې مرگژوبله واوښته.
د امریکا د دفاع وزارت په خبرپاڼه کې ویل شوي، په دغه بریدونو کې د اسلامي انقلاب د قدس ځواک سره تړلو ملېشو مرکزونه، استخباراتي مرکزونه، توغندي، د بېپېلوټه الوتکو د ساتنې مرکزونه او د ملېشو د اکمال ځایونه په نښه شوي دي.
د اسرائیلو له لوري پر غزې د سختې بمبارۍ له امله په منځني ختیځ کې هم حالات ورځ تر بلې خرابېږي، چې لوېدیځ یې پړه پر ایران اچوي؛ خو ایران د امریکا او اروپا دغه ډول تورونه رد کړي دي.
په سور سمندرگي کې د حوثیانو له لوري د امریکا او اسرائیلو سوداگریزې بېړۍ په نښه کېږي. تېره میاشت امریکا او برېتانیې په گډه اعلان وکړ، چې په یمن کې یې پر حوثیانو بریدونه کړي او د گڼې مرگژوبلې د اړولو ادعا یې هم کړې وه.
ایران د تېر په څېر ویلي، چې په منځني ختیځ کې پر امریکايي عسکرو په بریدونو کې لاس نه لري.
امریکا: په عراق او سوریه کې مو له ایران سره تړلې موخې په نښه کړي
مربوطه لیکنې
