د عبدالقهار بلخي په مشرۍ د افغان حکومت یو تخنیکي پلاوي بروکسل ته سفر وکړ، دا سفر د کابل او اروپايي ټولنې ترمنځ د ډیپلوماټیکو او تخنیکي اړیکو په مسیر کې د یوې داسې لاسته راوړنې په معنی دی چې ښيي واقعیت بیني په تدریجي ډول د سیاسي لیرې والي ځای نیسي. د دغه رسمي پلاوي سفر، په اصل کې دا پیغام لري چې افغان حکومت اوس د داسې یوه واقعیت په توګه منل شوی چې له پامه غورځول یې د هېڅ لوري په ګټه نه دی. دغه ناسته د افغانستان لپاره د دې فرصت و چې د کډوالو اړوند مسایلو، قونسلي خدماتو او نورو اړتیا وړ مسایلو باندې بحثونه وکړي.
د یاد سفر په غبرګون کې د اعتراضونو په نوم، په بهر کې د ځینو پخوانیو څېرو تحرکات او منفي تبلیغات تر ډېره د شخصي او سیاسي ګټو پر پاللو ور ګرځي. په داسې حال کې چې هېواد ثبات او له نړۍ سره پراخو ډیپلوماټیکو، اقتصادي او سیاسي اړیکو ته اړتیا لري، مخالفین د دې ټولو برعکس د هغوی مخالفت کوي، د افغانستان د تجرید او د ولس د ستونزو د دوام غوښتنه کوي. د هېواد د مخالفینو لپاره تر ټولو منطقي ځواب دا دی چې دوی نه شي کولای په اروپايي او نورو هېوادونو کې د میلیونونو افغانانو په برخلیک او ستونزو معامله وکړي، یا یې د سمون په وړاندې خنډ واقع شي؛ ځکه غوغا او شعارونه هېڅکله د حقیقي حل لارو ځای نه شي نیولای، بلکې نظامونه دي چې د ستونزو د حل په اړه اقدام کوي.
نننۍ نړۍ تر هر وخت زیات یو بل ته نږدې شوې او د یوه کلي بڼه یې خپله کړې ده، چې پکې هېڅ هېواد په انزوا کې ژوند نه شي کولای. افغانستان هم د دغه کلي د یوې خورا مهمې او ستراتیژیکې برخې په توګه باید له نړۍ سره ونښلي او نړۍ هم ورته اړتیا لري. د دغه نړیوال کلي غوښتنه دا ده چې د تېرو تجربو او فشار د سیاستونو پر ځای، د تفاهم او دوه اړخیز تعامل په روحیه کار وشي، ترڅو د ټولو اړخونو ګډې اندېښنې حل شي.
له بلې خوا، په ټوله اروپا کې په سلګونو زره افغانان مېشت دي چې هره ورځ د پاسپورټ تمدید، وثایقو او نورو اسنادو په موندلو کې له سختو کړاوونو سره لاس او ګرېوان دي. قونسلي خدمت د خلکو لومړنی او انساني حق دی، چې باید د سیاسي موخو قرباني نه شي. بروکسل ته د افغان پلاوي دغه سفر په ډاګه کړه چې د افغانانو د حقیقي ستونزو د حل لپاره یوازینۍ سمه لاره دا ده چې د افغان حکومت له مسؤولو ادارو سره مخامخ مفاهمه وشي.
په دې وروستیو کې جرمني ته د افغان حکومت د نویو ډیپلوماټانو د استولو تقاضا هم یو بل خورا مهم او هیله بښونکی ګام دی. برلین په حقیقت کې دا درک کړې چې د افغانانو د ستونزو د هواري او د امنیتي او مهاجرت په څېر د لویو قضیو د سمبالښت لپاره د افغانستان له رسمي ادرسونو پرته بله عملي لاره نشته. د جرمني دا پرېکړه د نورې اروپا لپاره هم د یوه رغنده مډل په توګه لاره پرانیزي.
دا ډول ډیپلوماتیک خوځښتونه نه یوازې دا چې په بهر کې مېشتو افغانانو ته د ژوند اسانتیاوې برابروي، بلکې د افغانستان او لوېدیځ ترمنځ د لا زیات باور جوړونې لپاره زمینه برابروي. د دې پروسې ثابت دوام او پرمختګ یوازې د رغنده اړیکو، متقابل احترام او د خلکو د ستونزو د درک له لارې شونی دی، چې پایله به یې د دواړو لورو په ګټه وي.
یادؤنه: په هندوکشغږ کې نشر شوې لیکنې، مقالې او تبصرې یواځې د لیکوالانو نظر څرګندوي، د هندوکشغږ توافق ورسره شرط نه دی.