د افغانستان د بهرنیو چارو وزارت وايي، د دغه وزارت سیاسي مرستیال شېرمحمد عباس ستانکزي د افغانستان لپاره د برېتانیې سفارت شارژدافېر رابرټ ډېکسن سره لیدلي دي.
له یاد وزارت څخه په خپره شوې خبرپاڼه کې ویل شوي، په دغه لیدنه کې په دوه اړخیزو او څو اړخیزو سیاسي مسئایلو په گډون، د دواړو هېوادونو ترمنځ د اړیکو په پیاوړتیا او بشري مرستو په اړه خبرې وشوې.
د خبرپاڼې له مخې، همدارنگه په نړیواله کچه د ښې همغږۍ او بنسټیزو اړیکو رامنځته کولو په پار د افغانستان په تړاو د نړیوالو ناستو د اغېزمنېدو لپاره د یو مسوول او حاکم اړخ په توگه په دغو ناستو کې د افغانستان په گډون ټینگار شوی دی.
په خبرپاڼه کې د برېتانیې سفارت شارژدافېر له قوله ویل شوي، برېتانیه له افغانستان سره ښو اړیکو ته لېوالتیا لري او د افغانانو د هوساینې په موخه چمتو دي چې له اوسني حکومت سره گډ کار وکړي.
ډېکسن ویلي، برېتانیه له افغانستان سره د بشري مرستې ډېروي.که څه هم اوسمهال د افغانستان او برېتانیې ترمنځ رسمي اړیکې نهشته؛ خو د افغانستان لپاره د برېتانیې سفارت شارژدافېر له گڼو افغان چارواکو سره لیدنې کتنې کوي او تمه شته چې ډېر ژر به دغه لیدنې د سفارت د پرانیستلو مرحلې ته ورسېږي.