برېټانوی یوټیوبر هیري جاګرډ په خپل یوټیوب چینل په خپره کړې ویډیو کې ویلي، افغانستان چې کلونه د نړۍ د ناامنه هېوادونو په سر کې یادېده، د ۲۰۲۶ کال په نړیوال سولې شاخص کې نور د نړۍ د پنځو تر ټولو ناامنه هېوادونو په ډله کې نه دی.
جاګرډ ویلي، افغانستان شاوخوا یوه لسیزه د نړیوال سولې شاخص په وروستیو او ناامنه هېوادونو کې شامل و، خو د ۲۰۲۶ کال په درجهبندۍ کې روسیه د نړۍ تر ټولو ناامنه هېواد بلل شوې ده.
د نوموړي په وینا، په دې درجهبندۍ کې تر روسیې وروسته سوډان، د کانګو دیموکراتیک جمهوریت، اوکراین او اسرائیل د نړۍ پنځه تر ټولو ناامنه هېوادونه دي.
جاګرډ په طنزیه انداز ویلي، افغانستان هغه هېواد و، چې ښايي ډېرو میندو به خپلو اولادونو ته ویل: «هلته مه ځئ!» خو اوس افغانستان د نړۍ د پنځو تر ټولو ناامنه هېوادونو له ډلې وتلی دی.
هغه همداراز ویلي، د دې درجهبندۍ له جالبو برخو څخه دا ده، چې د اروپا دوه هېوادونه هم د نړۍ د ناامنه هېوادونو په نوملړ کې شامل دي.