د افغان حکومت ویاند مولوي ذبیحالله مجاهد د «حکومت د مطبوعاتو په هنداره کې» پروګرام په درېیم مطبوعاتي کنفرانس کې وویل، چې په تېر یو کال کې د هېواد د مخابراتي پوښښ د پراختیا په موخه ۸۵۰ مخابراتي انټنونه فعال شوي دي.
د نوموړي په وینا، له دې ډلې ۳۵۰ انتنونه د مخابراتو او معلوماټي ټکنالوژۍ وزارت له پراختیايي بودجې په محرومو او لرو پرتو سیمو کې او ۵۰۰ نور د مخابراتي شرکتونو په مالي تمویل فعال شوي دي.
مجاهد ویلي، د مخابراتي خدمتونو د پراختیا ترڅنګ په بېلابېلو سیمو کې ۸۵۱ کیلومتره نوري فایبر شبکه هم غځول شوې او په ټول هېواد کې د مخابراتي شرکتونو، انټرنېټي خدمتونو وړاندې کوونکو او اترا ادارې له لوري ۲۹۳۲ مخابراتي ټاورونه جوړ شوي دي.
د هغه په خبره، په محرومو او لرو پرتو سیمو کې د مخابراتي خدمتونو د پراختیا لړۍ لا هم روانه ده او د ۱۵۰ نورو انتنونو د فعالولو چارې دوام لري.
مجاهد زیاته کړې، چې په تېر کال کې راستنېدونکو هېوادوالو ته د مخابراتي اسانتیاوو د برابرولو په موخه ۴۹۱ زره او ۱۲۶ سیمکارتونه هم وېشل شوي دي.
هغه وايي، د مخابراتي بازار د پراختیا له امله په همدې موده کې ۱۸۴ زره کسانو ته مستقیم او غیرمستقیم کاري فرصتونه برابر شوي دي.