لیکوال: محمد فیصل
بنګلدیش کې له تیرو څو ورځو راهیسې د شیخ حسینې واجد پر ضد سخت لاریونونه روان وو چې په پای کې نن هغه له هېواد څخه وتښتېده.
لاریونونه هغه مهال پیل شول چې د نوي قانون له مخې په دولتي دندو کې د هغو کسانو کورنیو ته ډېره ونډه ورکړل شوې وه، کومو چې د بنګلدیش د بیلتون په جګړه کې برخه اخیستې وه.
په ۱۹۷۱ کال کې د بنګلدیش مشر او د حسینې پلار شیخ مجیب الرحمن د بنګلدیش د ازادۍ جګړه پر مخ وړه او بنګلدیش یې له پاکستان څخه د هند په مرسته جلا کړ.
هغه مهال د ختیځ پاکستان (اوسني بنګلدیش) اسلامي ګوند جماعت اسلامي د بنګلدیش د بیلتون مخالفت کاوه؛٥ کله چې د سیکولر او سوسیالست ګوند (عوامي لیګ) مشر شیخ مجیب واک ترلاسه کړ، نو په جماعت یې بندیز ولګوه.
په ۱۹۷۵ کال کې شیخ مجیب په یوې پوځي کودتا کې ووژل شو، خو لور یې حسینه ژوندۍ پاتې شوه؛ وروسته حسینه سیاست ته راووته او شل کاله د بنګلدیش لومړۍ وزیره وه.
په بنګلدیش کې د حسینې عوامي لیګ د جماعت سخت مخالف دی او جماعت یې له بنګلدیش سره په خیانت تورن کړی دی؛ له ۲۰۱۳ کال راهیسې په ټاکنو کې جماعت ته د ګډون اجازه نه ورکول کیږي.
وروستیو لسو کلونو کې د حسینې مستبد حکومت د جماعت لسګونه مشران اعدام کړي او زرګونه نور یې بندیان کړي دي.
حسینې د تیرې جنورۍ میاشتې ناندریزو ټاکنو کې یو ځل بیا لومړی وزارت وګټه؛ هغه ټاکنې چې ټولو سیاسي ګوندونو رد کړي او له لاسوهنې یې ډکې بللې دي.
د تیرې جولای میاشتې په ۱۵مه د کار د نوي قانون پر ضد لاریونونه په تاوتریخوالي بدل شول؛ تر اوسه د پولیسو په ډزو له ۳۰۰ زیات کسان وژل شوي چې خونړۍ ورځ یې پرون وه او ۹۰ کسان پرون ووژل شول؛ دغه راز زرګونه نور کسان بندیان شوي هم دي.
دغه لاریونونه د حکومت ټولو مخالفو ډلو تنظیم کړي وو، خو جماعت هم پکې پراخ ګډون درلود.
تیره پنجشنبه د حسینې حکومت په جماعت اسلامي ګوند او د محصلینو په تنظیم یې بندیز ولګوه.
جماعت وویل چې د حسینې حکومت په دې ډول خپلې ناکامۍ پټوي، خو ۷۶ کلنه حسینه د خلکو زور ته ټینګه نه شوه او نن یې د خلکو د توندې غوسې له امله استعفی ورکړه او هند ته وتښتېده؛ پوځ ویلي چې یو سرپرست حکومت ته به واک وسپاري.
د مستبدې حسینې تښتېدل ممکن د جماعت اسلامي ګوند ډیر خوشحاله کړي، ځکه د حسینې او د دې د پلار له لوري له جماعت سره سخت او ظالمانه چلند شوی و.
یادؤنه: په هندوکشغږ کې نشر شوې لیکنې، مقالې او تبصرې یواځې د لیکوالانو نظر څرګندوي، د هندوکشغږ توافق ورسره شرط نه دی.
