د ټرانسپورټ او هوایي چلند وزارت په یوه خبرپاڼه کې ویلي، چې د روان کال په تېرو شپږو میاشتو کې له کابل نړیوال هوايي ډګر څخه څه کم ۱۱۰۰ کارګو الوتنې ترسره شوې، چې له لارې یې شاوخوا ۱۷۸۸۶ ټنه توکي وارد او صادر شوي دي.
د ټرانسپورټ او هوايي چلند وزارت د معلوماتو له مخې، په دې موده کې ۱۱۱ خالصې کارګو الوتنې ترسره شوې، چې ۷۵۳۵.۰۹۷ ټنه توکي یې لېږدولي دي. همدارنګه ۹۶۵ مسافروړونکو کارګو الوتنو شاوخوا ۱۰۳۵۱ ټنه توکي لېږدولي دي.
یادې کارګو او ګډې الوتنې د بېلابېلو هوايي شرکتونو له خوا هند، متحده عربي اماراتو، ترکیې او یو شمېر نورو هېوادونو ته ترسره شوې دي.
خبرپاڼه زیاتوي، چې د سوداګرو د لګښتونو د کمولو او د کارګو الوتنو د پراختیا په موخه، د هوايي چلند امنیتي فیس په هر ټن کې له ۱۰۰ څخه ۱۰ ډالرو او د ځمکنیو خدمتونو فیس له ۹۶ څخه ۴۰ ډالرو ته راکم شوی دی. سربېره پر دې، د منظمو ځانګړو کارګو الوتنو لپاره ۲۵ سلنه او د غیرمنظمو ځانګړو کارګو الوتنو لپاره ۵۰ سلنه تخفیف منظور شوی دی.