د سرحدونو، قومونو او قبايلو چارو وزارت په یوه خبرپاڼه کې ویلي، چې د یاد وزارت له لوري د شریعت د احکامو د نفاذ، ولسي یووالي او همغږۍ په موخه د فاریاب، زابل، سمنګان او کاپیسا ولایتونو په شپږو ولسوالیو کې له خلکو سره ولسي غونډې ترسره شوې.
په دغو غونډو کې د فاریاب په لولاش او بندر، د زابل په شهرصفا، د سمنګان په دوآب او درهصوف او د کاپیسا په الهسای ولسوالیو کې دیني عالمانو، قومي مشرانو او مخورو د ولسونو ترمنځ د یووالي او همکارۍ پر اهمیت ټینګار کړی او له مسوولو ادارو سره یې د همکارۍ چمتووالی ښودلی.
د وزارت مسوولینو هم د اسلامي نظام د بنسټونو د ټینګښت، د خلکو د غوښتنو د اورېدو او د ولسونو او مسوولو ادارو ترمنځ د لا زیاتې همغږۍ پر اړتیا خبرې کړي او د شریعت د احکامو عملي کېدل یې د ټولنیز نظم او اصلاح لپاره مهم بللي.