د عامه باور له مخې، اوس دا خبره په یقین بدله شوې ده چې په افغانستان کې د تښتېدلو مخالفینو کیسه پای ته رسېدلې او هغوی نور په هېڅ برخه کې رول نه لري. دوی په داسې عادي انسانانو بدل شوي دي چې په نورو هېوادونو کې د یوې مړۍ ډوډۍ د پیدا کولو او خپل نوم د ژوندي ساتلو لپاره ناروا هڅې کوي.
هغه مهال چې دغه بې عهده او نمک حرام کسان د واک پر ګدۍ ناست وو، د حکومت چارې یې په لاس کې وې او د قدرت او واکمنۍ ټولې سرچینې یې درلودې، تر ټولو ناوړه ممکنه کارنامې یې ترشا پرېښودې او خپل ملت یې د تباهۍ لوري ته یووړ.
دغه کسان اوس د خپلې ناکامۍ د لوړو دېوالونو ترشا، کله ناکله سرونه راپورته کوي او ځانونه داسې څرګندوي، لکه لا هم چې په میدان کې حاضر وي او د کړاوځپلي ملت د تباهۍ او وینې تویولو لپاره دې کومه خبره او پلان ولري.
باید هېره نه کړو چې دښمنان (که کورني وي او که بهرني) تل د خپل فکري او سیاسي چلند له مخې خپلو تشو او له کار لوېدلو بریدونو او یرغلونو ته دوام ورکوي او هېڅکله په ښکاره نه تسلیمېږي.
که یې په وس کې وای، لا ډېر او پراخ فزیکي بریدونه به یې کولی، په سیمه کې به یې دوړې او ګردونه پورته کول او د خلکو په منځ کې به یې شکونه او اندېښنې راپورته کولې. که په حقیقت کې مات، بې وسه، بې لاسو او بې پښو شوي هم وي، بیا هم هڅه کوي چې ساه واخلي، د جعل او فریب له لارې مخته ولاړ شي او لا هم د بریالیو او ګټونکو رول ولوبوي.
خو دا کمزوری او بې اغېزې رول د همېش لپاره کار نه شي ورکولی او یوه ورځ خامخا پای ته رسېږي. له هغوی څخه به د فریب او دوکې نښې او اغېزې له منځه وړل کېږي او نور به هېڅوک پرې باور ونه کړي.
لکه څنګه چې اوس د تښتېدلو مخالفینو روایت همداسې دی؛ ملت او هغه رسنۍ چې موضوعات په جدي توګه څاري، په دې باوري شوي دي چې د دوی ریښې وچې شوې او تنه یې کمزورې شوې ده. په ضمیر کې یې میدان ته د ننه کېدو جرئت او د مخته تګ باور نه دی پاتې.
افغانستان چې د لسیزو جګړو او ویجاړیو په ترڅ کې کوم څه تجربه کړل او نن ثبات او امنیت ته رسېدلی، د همدې وضعیت کیسه ده. هغه وضعیت چې تښتېدلي مخالفین تل هڅه کوي د دروغو او فریب له لارې، ناسم او دروغ خبرونه او معلومات د خلکو په ذهنونو کې ځای په ځای کړي.
ټول پوهېږي چې دا اجیرې او دوکه بازې ډلې د سیالیو له ډګره وتلې او د ماتې خوړلو په کتار کې درېدلې دي؛ د دوی د هڅو په قاموس کې د بریا هېڅ څرک نه لیدل کېږي.
له دې سره سره، همدغه غولول شوي کسان نه غواړي دا ومني چې د دوی د رسوایۍ کاسه د باور له بامه لوېدلې او د دوی اوسنی حقیقت ټولو خلکو، په ځانګړي ډول خپلو هېوادوالو، ته څرګند شوی دی.
کله ناکله د یوې نوې ډلې د جوړېدو اعلامیې خپرېږي او یا په کومه سیمه کې د ځینو کسانو د راڅرګندېدو خبرونه اورېدل کېږي، په دې سره دوی ځانونه په میدان کې حاضر معرفي کوي؛ خو ټول پوهېږي چې دا ځان ته د پام را اړولو او د نوم او ډوډۍ لپاره د سوال د کاسې د ګرزولو لپاره، یوازې دروغجنې نندارې دي.
یادؤنه: په هندوکشغږ کې نشر شوې لیکنې، مقالې او تبصرې یواځې د لیکوالانو نظر څرګندوي، د هندوکشغږ توافق ورسره شرط نه دی.