د پاکستان د لومړي وزیر سلاکار رانا ثناءالله په یو مرکه کې ويلي، چې د پاکستان پوځ د ګواښونو د له منځه وړلو لپاره د ډریورنډ فرضي کرښې دواړو غاړو ته د عملیاتو حق لري. دا څرګندونې یې له ولس څخه د خلاصون په پار کړې دي، ځکه چې په دې وروستیو کې د پاکستان په بېلابیلو سیمو کې، ستر بریدونه شوي دي، چې په ځینو مرګونو پېښو کې پوځ ته زیات مالي او ځاني زیانونه هم اوښتي دي.
ثناءالله له ولس څخه د خلاصون او د هغوی پوښتنو ته د ځواب په مقابل کې په غیر ارادي بڼه ویلي، چې د پاکستان پوځ د ګواښونو د له منځه وړلو لپاره د ډيورنډ فرضي کرښې دواړو خواو ته د عملیاتو حق لري.
له ثناءالله وړاندې د پاکستان دفاع وزیر خواجه آصف هم افغانستان تورن کړی و، چې د پاکستان مخالفین هلته پټنځایونه لري، که موږ وغواړو، نو په افغانستان کې نظامي عملیات کولای شو. په داسې حال کې چې پاکستان خپله د ټي ټي پي تر ډېرو سختو او مرګونو بریدونو لاندې ساه اخلي.
پاکستان له افغانستان سره د تاریخ په اوږدو کې نه دوست شوی او نه به دوست شي، دوی همېش افغانانو ته لومړی د دوستۍ او ورورولۍ لاس ورکړی، خو بیا یې برعکس کړنې ترسره کړې دي؛ له دې علاوه اوس خپل ولسونه په یوه او بله بهانه تېر باسي.
اوس مهال پاکستان، د هغه ډلو او ټپلو ملاتړ کوي، چې په افغانستان کې حاکم نظام ننګوي؛ دوی د بغاوتګرو حمایه کړې، فتنه ګرو ډلو ته یې پټنځایونه ورکړي او د دوی په غېږه کې شپې او ورځې سبا کوي، یو شمېر غړو یې د طالبانو په ضد له هماغه ځایه تبلیغاتي جګړه روانه کړې ده او ناسم تبلیغات کوي.
پاکستان باید د افغانستان په اړه پر خپله پالیسۍ له سره غوره وکړي، ځکه روانه پالیسي به ډېره سخته، ستونزمنه او خطرناکه ورته تمامه شي، ځکه چې واقعي افغانانو ته پر ولسونو ظلم او پر خاوره یې تېری، په هیڅ صورت د زغملو وړ نه دی.
ثناءالله په خپلو څرګندونو کې همدا راز ویلي، کله چې د فرضي کرښې د ها غاړې خبره کېږي، دا نړۍوال قانون دی چې، له هر ځایه ستاسو خاورې ته د برید ګواښ کېږي یا ورته چمتو والی نیول کېږي، بیا ستاسو حق دی چې د خپل امنیت لپاره اقدام وکړئ.
د روانې مرغومې میاشتې پر څلورمه نېټه د پاکستان جیټ الوتکو د پکتیکا په برمل ولسوالۍ کې بې رحمانه بمبارۍ وکړې، چې د ماشومانو په ګډون څه باندې ۵۰ تنه مهاجرین پکې شهیدان کړل؛ پاکستان له دغه تېري وروسته غاښ ماتوونکی ځواب ترلاسه کړ. اوس هم باید عبرت واخلي او له شریرو کړنو پر شا شي، ځکه چې افغان مؤمن او مجاهد ولس هیڅکله پر خپله خاوره د پردیو یرغلونه او بهرنۍ دسیسې نه دي منلي.
یادؤنه: په هندوکشغږ کې نشر شوې لیکنې، مقالې او تبصرې یواځې د لیکوالانو نظر څرګندوي، د هندوکشغږ توافق ورسره شرط نه دی.
