لسمه برخه
د جهاد له نوم څخه ناوړه ګټه پورته کول:
جهاد د شريعت په قاموس کې ډېر لوړ مقام لري، تر دې چې د اسلام تر ټولو لوړه څوکه ورته ويل کېږي.
اسلام په مکه کې یو دین و، خو کله چې مدینې ته راغی نو له سیاسي نظام سره یوځای دین شو.
اسلام په مکه کې ديارلس کاله په توحيد او د امت په عقيده کار وکړ، خو دائره يې له مکې نه بهر نه شوه، د پیغمبر صلی الله علیه وسلم د رسالت له لسم کال وروسته د اسلام وړانګې یو څه اندازه یثرب – مدینې منورې ته ورسېدلې.
په جزیرة العرب او وروسته په ټوله نړۍ کې د اسلام د خپرېدو اوج د کفارو او منافقینو په وړاندې د جهاد او مبارزې له امله و، دا د جهاد برکت و چې صلیبیان به د مسلمانو واکمنانو د نوم په اورېدو سره لړزېدل؛ دوی د مسلمانانو پر خاوره د برید جرئت نه درلود او اسلامي حکومت ته یې د ارام ژوند لپاره جزیه ورکوله.
همدا د جهاد له برکته وو چې کافران د ارام ژوند او علمي زده کړو لپاره اسلامي هېوادونو لکه قرطبې اندلس، مصر او د اسلامي نړۍ نورو برخو ته تلل.
د جهاد فلسفه له فساد سره مبارزه، د خدای کلام لوړول، او د کفارو سره مبارزه ده؛ باغي جبهې د جهاد سپیڅلی نوم واخیست خو د فساد او له کفارو سره د دوستۍ لپاره یې وکاروه.
دوی د جهاد خبرې کوي او ځانونه مجاهدین بولي، خو عملونه یې منافقانو او کفارو ته ورته دي، ځکه دوی له کفارو او غربیانو سره ملګري او له مسلمانانو سره په ټکر کې دي، له علماوو سره دښمني لري او په افغانستان کې له حاکم اسلامي نظام څخه ناراضه دي، له دې سره سره دوی بیا هم ځانونه مجاهدین بولي.
د سورة الفتح په ۲۹ آیت کې الله تعالی د یوه مجاهد انسان ځانګړنې او صفات داسې بیانوي، الله تعالی فرمایي:«أَشِدَّاءُ عَلَى الْكُفَّارِ رُحَمَاءُ بَيْنَهُمْۖ».
ژباړه: څوک چې له رسول الله صلی الله علیه وسلم سره دي، د کفارو په وړاندې سخت زړي او قوي دي، او پر یو بل ډېر مهربانه او نرم دي.
د بغاوت جبهې له دې آيت سره د مخالفت بيرغ پورته کړى دى ځکه چې د کفارو په وړاندې نرم دي، دوستي او تعامل ورسره کوي، خو د مسلمانانو او خپلو هېوادوالو په وړاندې بې رحمه، سخت زړي او متعصب دي.
باغیانو د جهاد او مجاهد تر نامه لاندې د هیواد ملي شتمنۍ او بیت المال لوټ کړل، دوی د جهاد نوم د وسیلې په توګه کارولی، نه د مجاهدینو اخلاق لري او نه د مجاهد بڼه، نه یې د مجاهد تقوی درلوده او نه د جهاد له احکامو څخه خبر وو.
دوی یوازې د جهاد او مجاهد په نومونو سره اشنا وو او بس؛ د مجاهد تر نامه لاندې یې هر ظلم وکړ، د کفارو په څنګ کې یې د مجاهد په نوم د مسلمانانو پر ضد جګړه کوله، د مجاهد په نوم یې د خلکو پر کورونو بریدونه وکړل او بې حرمتۍ یې واړولې.
د جهاد او مجاهد تر چتر لاندې یې رشوت اخیست او قانون او مقررات یې پلورل؛ په عموم کې یې د جهاد او مجاهد نوم بد کړ، ځکه د دوی موخه جهاد نه، بلکې خپلو شیطاني هیلو ته رسېدل وو.
الله جل جلاله د افغانستان په ملت رحم وکړ چې اسلامي امارت یې واک ته ورساوه، تر څو د دې سرټیټو بلواګرو ځالې له منځه ولاړې شي او د افغانستان شریف ولس سولې او سوکالۍ ته ورسېږي.
یادؤنه: په هندوکشغږ کې نشر شوې لیکنې، مقالې او تبصرې یواځې د لیکوالانو نظر څرګندوي، د هندوکشغږ توافق ورسره شرط نه دی.
