د کورنیو چارو وزارت په یوه خبرپاڼه کې ویلي، چې د یاد وزارت وزیر، خلیفه سراجالدین حقاني، د افغانستان د کرکټ ملي لوبډلې د پخواني لوبغاړي شاپور ځدراڼ د مړینې له امله د هغه کور ته ورغلی او د نوموړي له کورنۍ سره یې غمرازي کړې او د تسلیت مراتب یې ورته وړاندې کړې دي.
د خبرپاڼې د معلوماتو له مخې، خلیفه سراج الدین حقاني د شاپور ځدراڼ د کورنۍ تر څنګ د افغانستان د کرکټ ملي لوبډلې له لوبغاړو سره هم خواخوږي څرګنده کړې او نوموړی یې یو پیاوړی او پر ولس ګران ځوان بللی او د هغه په خبره «مړینې یې ګڼ هېوادوال غمجن کړي دي.»
د یادونې وړ ده، چې د افغانستان د کرکټ ملي لوبډلې پخوانی چټک توپاچوونکی شاپور ځدراڼ، له یوې مودې ناروغۍ وروسته په هند کې ومړ او پرون د کابل په مرنجان غونډۍ کې خاورو ته وسپارل شو.