د ۳۱۳ مرکزي قول اردو وایي، د درېیمې پلې لواء ځواکونو یې د کابل اړوند ماهیپر سیمه کې د اوبو ډنډ کې د ډوب شویو دوو تنو ځوانانو جسدونه له اوبو ایستلي.
یاد کسان تېره ورځ له کابل څخه ماهیپر ته د تفریح په موخه تللي وو، چې د عکس اخیستنې پر مهال یې یو تن د اوبو ډنډ ته لوېدلی وو؛ «بل ملګري یې د ژغورنې هڅه کوله چې له امله یې هغه هم ژوند بایللی او په اوبو کې لادرکه شوي وو.»
د ۳۱۳ مرکزي قول اردو د خبرپاڼې له مخې، د دواړو لادرکه شويو ځوانانو جسدونه له اوبو څخه تر ایستل کېدو وروسته د پوځي امبولانس په وسیله کابل ته انتقال او خپلو کورنیو ته سپارل شوي دي.