د دفاع وزارت په یوه خبرپاڼه کې ویلي، چې د دفاع وزارت اړوند د هوايي ځواک او هوایي دفاع ځواکونو عمومي قوماندانۍ یوه Mi-17 ډوله چورلکه د ۱۳ میاشتو پرلهپسې تخنیکي کار، اساسي ترمیم، ازموینو او فني ارزونو له بشپړېدو وروسته، د یادې قوماندانۍ د مسلکي انجینرانو او تخنیکرانو په هڅو په بریالیتوب سره بیا رغول شوې او الوتنې ته چمتو شوې ده.
د یادې قوماندانۍ مسوولینو د انجینرانو او تخنیکرانو د شپې او ورځې هڅې ستایلي او ټینګار یې کړی، چې د هوايي وسایطو د ترمیم، بیارغونې او چمتووالي بهیر به لا پیاوړی دوام ولري.
د هغوی په وینا، دغه لاسته راوړنه د هېواد د هوايي ځواکونو د عملیاتي وړتیاوو د لوړولو، د چمتووالي کچې د زیاتوالي او د هوايي مدافعې د ظرفیتونو د پیاوړتیا په برخه کې مهم ګام ګڼل کېږي.