د پنجشیر ولایت د رسنیو دفتر په یوه خبر پاڼه کې ویلي، چې د کرنې او بڼوالۍ د ودې لپاره د ترسره شویو هڅو په پایله کې د روان ۱۴۰۵ کال پر مهال په دغه ولایت کې د توتو او غنمو حاصلات د پام وړ زیات شوي او لسګونه ټنه ګیلاس هم بهرنیو بازارونو ته صادر شوي دي.
خبرپاڼه د پنجشیر د کرنې، اوبولګولو او مالدارۍ د رئیس، قاري فضل الله دیوبند له قوله لیکي، چې سږ کال شاوخوا ۱۴۰۰ هکټاره ځمکه د توتو تر کښت لاندې وه او د دې مېوې تولید له ۳۵۰۰ مټریک ټنو څخه ۴۰۲۳ مټریک ټنو ته لوړ شوی، چې د تېر کال په پرتله ۱۳ سلنه زیاتوالی ښيي.
د نوموړي په وینا، مناسب اقلیمي شرایط، د حاصلاتو د راټولولو پر مهال د بارانونو نشتوالی، د مېوو وچولو دستګاوو وېش او د کرنیزو کانالونو جوړول او بیارغونه د توتو د حاصلاتو د زیاتوالي مهم عوامل دي.
د خبرپاڼې د معلوماتو له مخې په دې ولایت کې د کرنیزو پراختیایي پروژو د پلي کېدو، د بڼوالۍ د سیستم د عصري کېدو او له ملي او نړیوالو مؤسسو سره د همغږۍ په نتیجه کې د غنمو حاصلات هم سږ کال ۱۸ سلنه زیات شوي دي.
خبرپاڼه زیاتوي، چې د پنجشیر د رهبرۍ د هڅو په پایله کې سږ کال د دغه ولایت ۱۳۰ ټنه ګیلاس روسیې او د منځنۍ اسیا هېوادونو ته صادر شوي، چې د سیمه ییز اقتصاد د پیاوړتیا او د بزګرانو او بڼوالو د عوایدو د لوړولو لپاره مهم ګام بلل کېږي.
خبرپاڼه د کرنې ریاست له قوله زیاتوي چې په پنجشیر کې د توتو بېلابېل ډولونه لکه شاهي توت، شېر توت، بېدانه توت، سپین توت او تور توت کرل کېږي. دغه راز په وروستیو کې ۱۶۵ د مېوو وچولو دستګاوې هم بڼوالو ته وېشل شوې دي، ترڅو د حاصلاتو د پروسس، ساتنې او بازارموندنې زمینه لا پیاوړې شي.
چارواکي ټینګار کوي چې د کرنې او بڼوالۍ پراختیا د ځانبساینې او اقتصادي ودې له مهمو بنسټونو څخه ده او په تېرو درېیو کلونو کې د نورو برخو ترڅنګ کرنیز سکتور هم د پام وړ پرمختګ کړی دی.