د اسرائیلو پوځي او امنیتي چارواکي مصر ته تللي، څو په رفح ښار باندې د برید لپاره د مصر سره هوکړې ته ورسیږي.
د غزې په شمال باندې د اسرائیلو د دوامدارو بریدونو په نتیجه کې اکثره فلسطیني بې ځایه شوي، په غزې کې یې رفح ښار ته پناه وړې ده، چي د مصر له سرحد سره نژدې دی.دمګړۍ د رفح په وړوکې ښار کې کابو دوه میلیونه فلسطینیان میشت شوي او دا ښار د نړۍ تر ټولو په ګڼ میشته سیمه بدله شوې ده.
په دې وروستیو کې د اسرائیلو لومړي وزیر بن امین نتانیاهو ویلي، چي په رفح ښار باندې یې د پوځي عملیاتو پرېکړه کړې ده، حال دا چي نړیوالو په رفح باندې د عملیاتو د پایلو په هکله دغه رژیم ته خبرداری ورکړی دی.
مصر په جواب کې ویلي دي چي په رفح باندې عملیات نه مني، ځکه چي فلسطینیان د مصر خاورې ته د اوښتلو لپاره مجبوره کوي.
د ځینو رسنیو د راپورونو له مخې چي د اسرائیلو د فوځ لوی درستیز هرتسي هالوي او د شاباک د استخباراتو مشر رونین بار په پټه مصر ته تللي دي، څو له مصري چارواکو سره، په رفح باندې د عملیاتو په هکله خبرې وکړي.
هغوی مصري چارواکو ته ډاډ ورکړی دی چې په رفح باندې د عملیاتو پرمهال نه پرېږدي چې حتی یو فلسطینیی هم د مصر خاورې ته پناه یوسي.