د اسلامي نړۍ د علماوو نړيوالې شوری (اتحاد العالمي لعلماء المسلمين) د صهيونيستي اسرائيلو د اشغال او وحشت په اړه فتوا ورکړې او ويلي یې دي چې د اسرائیلو په وړاندې د نړۍ په هر مسلمان جهاد فرض دی.
د يادې شوری په فتوا کې همدا راز په اسلامي او عربي هېوادونو غږ شوی چې سمدستي په فلسطين کې پوځي مداخله وکړي، په اسرائيلو هوايي، ځمکنۍ او بحري لارې وتړي او په وينا یې دا کار د اسلام د مبارک دين له مخې واجب دی.
د مسلمانو علماوو نړيوالې شوری په فتوا کې همدا راز راغلي «د فلسطيني مقاومت (حماس غورځنګ) مالي، پوځي، سياسي او حقوقي مرسته او ملاتړ شرعا واجب دی، سمدستي باید اسلامي پوځي اتحاد جوړ شي تر څو د امت ننګه او مرسته وکړي».
په فتوا کې دغه راز له صهيونيستي اشالګرو سره هر ډول اړيکې حرامې بلل شوې دي او په هغوی ګاز او تيل خرڅول هم مطلق حرام ګڼل شوي او اسلامي هېوادونه ترې منعه شوي دي.
د نړۍ د مسلمانو علماوو شوری په ياده فتوا کې په عربي هېوادونو غږ شوی چې له صهيونيستي اسرائيلو سره په خپلو شویو تړونونو له سره نظر وکړي او لغوه یې کړي.
په فتوا کې راغلي چې د غزې له خلکو سره هر ډول مالي مرسته او د هغوی پر وړاندې د سرحدونو خلاصول واجب دي.
په پای کې له ټولو اسلامي ګوندونو او موسسو غوښتل شوي، چې ژر تر ژره بايد په امريکا او ټرمپ فشار راوړي تر څو د سولې په اړه کړې وعدې عملي کړي او په غزه کې روان ناورين پای ته ورسېږي.
